اذن وئر توی گئجه سی من ده سنه دایه گلیم

ال قاتاندا سنه مشاطه، تماشــــایه گلیم


سن بو آیلی گئجه ده سیره چیخان بیر سرو اول

اذن وئر، من ده دالونجا سورونوب سایه گلیم


منه ده باخدین او شهلا گؤزوله، من قارا گون

جرئتیم اولمادی بیر کلمه تمنایه گلیم


من جهنم ده ده باش یاسدیقا قویسام سنیله

هئچ آییلمام کی دوروب جنت مأوایه گلیم


ننه قارنیندادا سنله اکیز اولسیدیم اگر

ایسته مزدیم دوغولب بیرده بو دونیایه گلیم


سن یاتیب جنتی رؤیاده گؤرنده گئجه لر

من ده جنت ده قوش اوللام کی او رؤیایه گلیم


قیتلیغ ایللر یاغیشی تک قورویوب گؤز یاشیمیز

کوی عشقینده گره ک بیرده مصلایه گلیم


سن ده صحرایه ماراللار کیمی بیر چیخ نولی کی

من ده بیر صیده چیخانلار کیمی صحرایه گلیم


آللاهوندان سن اگر قورخمویوب اولسان ترسا

قورخورام من ده دؤنوب دین مسیحایه گلیم


شیخ صنعان کیمی دونقوز اوتاریب ایللرجه

سنی بیر گؤرمه ک ایچون معبد ترسایه گلیم


یوخ صنم، آنلامادیم، آنلامادیم حاشا من

بوراخیم مسجیدیمی سنله کیلیسایه گلیم


گل چیخاق طور تجلایه سن اول جلوه ی طور

من ده موسی کیمی او طور تجلایه گلیم


شیردیر شهریارین شعری الینده شمشیر

کیم دئیه ر من بئله بیر شیریله دعوایه گلیم؟




+ نوشته شده در یکشنبه 10 آذر 1392ساعت 17:21 توسط امیر نظرات (1)












 فال حافظ - فروشگاه اینترنتی - قالب وبلاگ